काठमाण्डौं,असार ६ । कुवेतबाट नेपाल फर्किएका १ सय ३ जनामध्ये ९ जनामा कोरोना भाइरसको संक्रमण पुष्टि भएको छ ।

नेपाली सेनाका प्रवक्रा विज्ञानदेव पाण्डेले कुवेतबाट नेपाल फर्किएका १ सय ३ जना मध्ये ९ जनामा कोरोना संक्रमण पुष्टि भएको जानकारी दिएका हुन् ।
प्रवक्ता पाण्डेका अनुसार कुवेतबाट विहीबार नेपाल फर्किएका सबैलाई भक्तपुरको नेपाल विद्युत प्राधिकरणका तालिम केन्द्रमा राखिएको थियो ।

जसमध्ये एक जनालाई दुईदिन अघि नै स्वास्थ्यमा समस्या देखिएपछि अस्पताल भर्ना गरिएकोमा स्वाब परीक्षण गर्दा नतिजा पोजेटिभ आएको छ ।

यस्तै अन्य १ सय २ जनाको आज आएको पीसीआर परीक्षणको नतिजामा ८ जनामा पोजेटिभ देखिएको हो ।

उनीहरुमध्ये मोरङको रतुवामाई–८ की ४२ वर्षकी महिला, मोङकै पार्थी– १० की ४१ वर्षकी महिला, कास्की धान्द्रुककी २३ वर्षकी महिला, नवलपरासीको देवचुलीकी २९ वर्षकी महिला, झापा हल्दिबारीकी ३७ वर्षकी महिला, नवलपरासी कावासोती–४ की ३३ वर्षकी महिला, सुर्खेत छिन्चु– ५ की २८ वर्षकी महिला र बाराकी २८ वर्षकी महिला रहेका छन् ।

यस्तै यसअघि नै अस्पतालमा भर्ना भएकी एक जना महिला नवलपरासीकी रहेको उनले बताए ।

उनलाई टेकुमा रहेको शुक्रराज ट्रपिकल तथा सरुवा रोग अस्पतालमा भर्ना गरिएको छ भने आज संक्रमण पुष्टि भएका ८ जनालाई पाटन अस्पतालको आइसोलेसनमा भर्ना गरिएको प्रवक्ता पाण्डेले जानकारी दिए ।

कुवेतबाट नेपाल आएका १०३ मध्ये ९४ जनाको भने पीसीआर परीक्षणको रिपोर्ट नेगेटिभ आएको प्रवक्ता पाण्डेले खबरहबलाई जानकारी दिए ।

यस्तै पीसीआर परीक्षणमा कोरोना नेगेटिभ देखिएकालाई भने सम्भव हुनेहरुलाई होम क्वारेन्टाइनमा पठाउने तयारी भएको छ ।