सिन्धुपाल्चोक २१ । बलेफी गाउँपालिकाको वडा नं. ३ धुस्कोट रहेको कर्मडुप्ग्युलिङ गुम्बामा भोली शुक्रबार बुद्ध जयन्ती भव्यरुपमा मनाउने भएको छ । गुम्ब व्यवस्थापन समितिका एक सदस्यले उक्त दिन गुम्बामा पूजाअर्चना गर्ने र सो कार्यका लागि १ हप्ता अगाडि देखी तयारी गरेको जनाए ।

बुद्धको दर्शन,मोलम पाठ मा सहभागी हुन सबैलाई निम्तो गरेका छन्।

प्रत्त्येक बर्ष बुद्ध जयन्तीका दिन भगवान बुद्धको माने, मोलम पाठ गर्दै मनाउँदै आएको छ। गुम्बामा केही वर्षदेखि करिब ४० जना स्थानीयहरु सहितको माने समुह पनि स्थापना भैसकेको छ। साथै दर्जन जति लामा पढ्ने बुद्ध अनुयायीहरु पनि यस गुम्बामा शिक्षा लिँदै आएका छन् ।

आनन्द संघ र फुलाहरी गुम्बा काठमाडौको आर्थिक सहयोगमा निर्माण भएको गुम्बाको पहलमा २०७२ सालको भुकम्पका बेला यस भेगका दर्जनौं गाउँमा विभिन्न सहयोग गरेका थिए । हाल यो गुम्बा निर्माण भैसकेको छ भनें यसका वरिपरिका जमिन सम्याउने कार्य बाँकी रहेको छ ।