काठमाण्डौ,फागुन १० । आईसीसी टी–२० विश्वकप ग्लोवल क्वालिफायरको सेमिफाइनलमा आज नेपालले युएईको सामना गर्दैछ । टी–२० विश्वकपमा छनोट हुने लक्ष्य बोकेको नेपालका लागि आज युएईसँगको खेल निकै महत्वपूर्ण छ ।

ओमानको अल अमेरातमा दिउँसो ३ः ४५ बजे सुरु हुने यो खेल जितेमा नेपाल विश्वकपका लागि छनोट हुनेछ ।नेपाल आज युएईलाई हराउँदै फाइनल पुग्न चाहन्छ । युएईको चाहना पनि त्यही छ ।

आजकाे खेलमा विजेता बन्दै फाइनल पुग्ने टोली अष्ट्रेलियामा आगामी अक्टोबर १६ देखि नोभेम्बर १३ सम्म हुने आईसीसी पुरुष टी–२० विश्वकपमा छनोट हुनेछन् ।

समूह चरणकाे खेलमा लगातार जित निकाल्दै सेमिफाइनल पुगेकाे नेपाल उच्च मनाेवलका साथ मैदान उत्रिनेछ । सोमबार समूह चरणको अन्तिम खेलमा नेपालले क्यानडामाथि ८ विकेटको शानदार जित हात पारेकाे थियाे ।

पहिला बलिङ गर्दै नेपालले क्यानडालाई ८० रनमा अलआउट गर्‍यो, पछि मात्र २ विकेट गुमाएर १४ ओभर १ बलमा लक्ष्य पूरा गरेकाे थियाे । यही दबदबा आजकाे खेलमा पनि कायमै राखे नेपाल दाेस्राेपटक विश्वकप खेल्नेछ । समाचार शिलापत्रले छापेको छ ।