काठमाडौं, माघ २३ गते । नेपाल प्रहरी क्लबकी राममाया बुढाले गोल्डेन एथलेटिक्स मिटको महिला १ हजार ५ सय मिटर दौडमा आइतबार स्वर्ण जितेकी छन् ।
त्रिपुरेश्वरस्थित दशरथ रंगशालामा राममायाले निर्धारित दूरी ५ मिनेट ००.६ सेकेन्डमा पूरा गरिन् । नेपाल एपीएफ क्लबका पूलमति राना दोश्रो तथा आशा रावत तेश्रो भए । सो स्पर्धाको पुरुषमा प्रहरीका नागेश्वर ऐरले ४ मिनेट ०८.९ सेकेन्डमा दौड टुंग्याउदै शीर्ष स्थान हात पारे । एपीएफका सन्जिव नेपाली दोश्रो तथा विकेश घिमिरे तेश्रो स्थानमा रहे ।

एथलेटिक्स परिवार नेपालले आयोजना गरेको प्रतियोगिताको महिला १० हजार मिटर दौडमा प्रहरीकी रेखा विष्टले ३९ मिनेट ३८.७ सेकेन्डमा पूरा गर्दै स्वर्ण जितिन् । दोलखाकी अन्जु खड्काले रजत तथा प्रहरीकी सुमिगा चौधरीले कांस्य हात पारे । पुरुष ४ गुणा १ सय मिटर रिलेमा एपीएफ पहिलो, लुम्बिनी दोश्रो र प्रहरी तेश्रो बने । सो स्पर्धाको महिलामा एपीएफ प्रथम, हिमालयन एन्जल्स द्वितीय र प्रहरी तृतीय स्थानमा रहे ।

पुरुष १ सय मिटर दौडमा कर्णालीका युवराज विकले स्वर्ण, एपीएफका शिवराज पार्कीले रजत र एपीएफकै निरप्रताप महतोले कांस्य जिते । महिला ४ सय मिटर दौडमा ५९.७० सेकेन्ड समयसाथ एपीएफकी रमिताकुमारी थारु शीर्ष स्थानमा रहिन् । एपीएफकै कल्पना श्रेष्ठ दोश्रो तथा दाङकी अरुजा रिजाल तेश्रो भए ।

महिला हाइजम्पमा लम्जुङकी सिमा श्रेष्ठ १ मिटर ३६ सेन्टीमिटर उचाइ नाघ्दै पहिलो भइन् । प्रहरीका लक्ष्मी साउद दोश्रो तथा विर्सना फुयाँल तेश्रो भए । महिला लङजम्पमा दाङकी निशा चौधरी, प्रहरीकी सिमा चौधरी दोश्रो तथा एपीएफकी रन्जिता राई क्रमशः शीर्ष तीन स्थानमा रहे । पुरुष हाइजम्पमा कपिलवस्तुका प्रभु थापा पहिलो भए । उनले १ मिटर ६२ सेन्टीमिटर उचाइ नाघे । प्रहरीका चन्द्रदेव जोशी दोश्रो तथा कैलालीका नरबहादुर साउद तेश्रो   भए ।

महिला १ सय मिटर दौमा दाङकी निशा चौधरी पहिलो भइन् । निशाले निर्धारित दूरी तय गर्न १२.५३ सेकेन्ड समय खर्चिन् । प्रहरीकी लक्ष्मी साउद र ललितपुरकी रजिना दुलाल तेश्रो बने । पुरुष ४ सय मिटर दौडमा प्रहरीका तेजबहादुर कार्कीले स्वर्ण जिते । उनले ५१.४५ सेकेन्डमा दौड सकाए । लुम्बिनीका तुलसीराम थारु दोश्रो तथा एपीएफका आशिष चौधरी तेश्रो भए ।
पुरुष लङजम्पमा एपीएफका सलिम देवानले स्वर्ण चुमे । उनले ७ मिटर ०९ सेन्टीमिटर दूरी तय गरे । लुम्बिनीका सुदिप थारु दोश्रो तथा प्रहरीका मिथुन चौधरी तेश्रो भए । पुरुष १० हजार मिटर दौडमा पर्वतका तीर्थ पुनले बाजी मारे । तीर्थले ३० मिनेट ४७.१ सेकेन्ड समय निकाल्दै स्वर्ण जितेका हुन् । एपीएफका राजेन्द्र तामाङ दोश्रो तथा सन्तोषविक्रम विष्ट तेश्रो भए ।

एनएसएसको उपाधि राजर्शी गुरुकुललाई
राजर्शी गुरुकुलले नेसनल स्कुल अफ साइसेन्स (एनएसएस) उपत्यकाब्यापी अन्तरविद्यालय फुटबल प्रतियोगिताको उपाधि जितेको छ । आइतबार भएको फाइलन खेलमा एभरेस्ट पब्लिक एकेडेमीलाई पेनाल्टी सुटआउटमा पराजित गर्दै राजर्शीले ३०औं एनएसएसको उपाधि जितेको हो ।

निर्धारित समयको खेल २–२ गोलको बराबरीमा सकिएपछि खेलको छिनोफानो पेनाल्टी सुटआउटमा भएको थियो । पेनाल्टीमा राजर्शी ५–४ ले विजयी भयो । प्रतियोगितामा विद्या सस्कृति स्कुल तेस्रो भयो ।

यसैगरी बास्केटबलतर्फको उपाधि बौद्ध एकेडेमी र भ्याली पब्लिक स्कुलले जितेका छन् । पुरुषतर्फ बौद्धले भ्याली पब्लिकलाई हरायो । सेन्ट जेभियर स्कुलले तेस्रो स्थान प्राप्त ग¥यो ।

महिलातर्फको खेलमा भ्याली पब्लिक स्कुलले उपाधि जित्यो । भ्यालीले दिक्षालय स्कुललाई हरायो । संस्कृती अन्तर्राष्ट्रिय स्कुलले तेस्रो स्थान हासिल गरेको छ ।
विजेतालाई एनएसएसका संस्थापक प्रिन्सिपल डा. माधव प्रसाद बराल, प्रतियोगिताका संयोजक प्रभात रिसाल लगायतले पुरस्कृत गरेका थिए । प्रतियोगितामा फुटबलतर्फ १२ र भलिबलतर्फ ११ टोलीको सहभागीता थियो ।