काठमाण्डौं,भदौ ९ । प्रतिनिधि सभाको लेखा समितिका सभापति ऋषिकेश पोखरेलमाथि सांसदहरूले प्रश्न उठाएपछि नेकपा एमालेका सांसद गोकुल बाँस्कोटाले बचाउ गरेका छन् । उनले सभापति र समितिमाथि आक्रमण नगर्न समेत आग्रह गरे । लेखा समितिको सभापति प्रमुख प्रतिपक्ष दलले पाउनुपर्ने प्रश्न उठेपछि बाँस्कोटाले राष्ट्रिय सभा अध्यक्ष नै फेर्न माग गरे । ‘हिजो एमाले प्रतिपक्षमा हुँदा हाम्रो विमति थियो ।

हिजो अदालतले सरकार बनाएको थियो, हाम्रो विमति थियो । तत्कालीन समयमा सभापति फेरौँ भनेर मैले कुरा उठाएको हो,’ उनले भने, ‘ आज परिस्थिति राजनीतिक सहमतिको हो । लेखा समिति सभापति फेर्ने भए राष्ट्रिय सभाको अध्यक्ष फेरौँ । प्रतिनिधि सभाको उपसभामुख फेरौँ अनि यहाँ पनि फेरौँ ।’ उनले सबै समितिको सभापतिमा चुनाव गरौँ, तयार हो ? भनि प्रश्न उठाए ।

समिति सभापतिमाथि बारम्बार हमला नगर्न भन्दै उनले सभापति चाहिएको भए राजनीतिक सहमति खोज्न पनि आग्रह गरे ।