काठमाण्डौं,असोज ७ गते । राष्ट्रिय खेलकुद परिषद् (राखेप) का सदस्य–सचिव टंकलाल घिसिङले अन्तर्राष्ट्रिय ट्रेल रेसका पदक विजेता मनकुमार रोका मगरलाई आइतबार भेट गरी बधाइ दिएका छन् । त्रिपुरेश्वरस्थित आफ्नै कार्य कक्षमा भेटी सदस्य–सचिव घिसिङले मनलाई सफलताका लागि बधाइ दिदै आगामी यात्राका लागि शुभकामना दिए ।

मनले जुलाइ ७ देखि सेप्टेम्बर २१ तारिखको अवधिमा भएको विभिन्न ७ अन्तर्राष्ट्रिय ट्रेल रेसमा सहभागिता जनाउने क्रममा १ स्वर्ण, १ रजत र १ कांस्य पदक जितेका थिए । सबै प्रतियोगिता स्विट्जरल्यान्डमा भएको थियो । उनले ६.३ किलोमिटर दूरीको ग्रिम्पेटे डेस बेद्ज्युस अपहिल रेसमा स्वर्ण, १० किलोमिटर दूरीको ओभरनाज कबेन राम्वर्टमा रजत तथा २८ किलोमिटर दूरीको एन्जेरे टुर डेस अल्पेज्स भलेसमा कांस्य जितेका थिए ।

रोल्पाको थवाङ निवासी २१ वर्षीय उनले विभिन्न २२ घरेलु ट्रेल रेसमा सहभागी भइसकेका छन् । त्यसमा उनले मन्जुश्री ट्रेल रेससहित ८ स्वर्ण, ३ रजत र ३ कांस्य पदक जितेका छन् ।

दक्षिण कोरियामा हुने ट्रेल रेसमा सहभागिता जनाउने तयारी गरिरहेका मनले आफ्नो गतिमा सुधार गर्न सके ट्रेलबाट रोड रेसमा ध्यान दिने योजना रहेको बताए ।