काठमाडौं, मंसिर ३ गते ।राष्ट्रिय खेलकुद परिषद् (राखेप) कर्मचारी संघले प्रदेश खेलकुद विकास परिषद्, बागमती प्रदेशका सदस्य–सचिव दीपक लामालाई आइतबार सम्मान गरेको छ ।

सदस्य–सचिवमा नियुक्त भएकोमा लामालाई सम्मान गरिएको संघले जनाएको छ । सो अवसरमा संघकी अध्यक्ष सरस्वती केसी र महासचिव कुमार बस्नेतले सदस्य–सचिव लामालाई दोसल्लासहित मायाको चिनो प्रदान गरी सम्मान गरे ।

कार्यक्रममा प्रशासन विभाग प्रमुख प्रेमबहादुर मल्ल, तालिम तथा प्रशिक्षण विभागका निर्देशक सोभितराज प्रसाईं, आपूर्ति तथा भण्डार शाखाका प्रमुख देवराज कटुवाल, राखेप कर्मचारी संघका पूर्व अध्यक्ष रञ्जन थापालगायतका पदाधिकारीले सदस्य–सचिव लामालाई बधाई दिदै कार्यकाल पूर्ण सफलताका लागि शुभकामना दिए ।

सदस्य–सचिव लामाले खेलकुदको विकास र विस्तारका लागि सबैसंग सहकार्य गरी अगाडि बढ्ने प्रतिबद्धता व्यक्त गर्दै खेल पूर्वाधारको संरक्षण ठूलो चुनौती भएको बताए ।
अध्यक्ष केसी र महासचिव बस्नेतले खेल क्षेत्रकै व्यक्तिलाई जिम्मेवारी दिएकोमा खुशी व्यक्त गर्दै सदस्य–सचिव लामालाई बधाई दिए ।