कैलाली, २२ फागुन । जिल्ला अदालत कैलालीले टीकापुर घटनामा रेशम चौधरीलाई दोशी ठहर गर्दै अभियुक्त रेशम चौधरीलाई जन्मकैदको फैसला सुनाएको छ ।

न्यायाधीश परशुराम भट्टराईको एकल इजलासले चौधरीसहित ११ जनालाई दोषी ठहर गरेको हो । उनीसंगै अभियुक्त ठहर भएका लक्ष्मण थारुलाई भने तीन वर्षको कैद सुनाएको छ ।

उनले तीन वर्ष जेल बसिसकेकाले आजै रिहा हुने भएका छन् । मधेसी÷थारु आन्दोलनका क्रममा ७ भदौ २०७२ मा कैलालीको टीकापुरमा भएको हिंसात्मक झडपमा नेपाल प्रहरीका एसएसपीसहित ८ जनाको मृत्यु भएको थियो । सो घटना पछि चौधरी फरार भएका थिए । फरार अवस्थामा नै प्रतिनिधि सभा निर्वाचनमा लडेर उनले चुनाव पनि जितेका थिए ।

उनले यस अघि सांसद पदको सपथ पनि लिइसकेका छन् । चुनाव जितेको प्रमाणपत्र लिन पाउनुपर्ने माग गर्दै सर्वोच्च अदालतसम्म गएका चौधरीले मुद्दा हारेपछि १४ फागुन २०७४ मा जिल्ला अदालत कैलाललीसामू आत्मसमर्पण गरेका थिए ।