काठमाण्डौं,माघ २५ ।  टिका पुन सांगीतिक साँझ सम्पन्न भएको अवसरमा  “धन्यबाद ज्ञापन तथा सम्मान पत्र बितरण कार्यक्रम – २०७९” सम्पन्न भएको छ । बुधबार इन्द्रेणी फुड ल्याण्डमा सम्मान कार्यक्रमको आयोजना गरि सम्मान पत्र बितरण गरिएको हो ।

कार्यक्रम सफल बनाउन सहयोग गर्ने प्रायोजक,कलाकार,सहयोगी संघसंस्था र पत्रकारहरुलाई सम्मान स्वरूप  “कदर पत्र” प्रदान गरिएको थियो । दर्पण संगीतालयका अध्यक्ष उदिराम खड्काको अध्यक्षतामा सम्पन्न उक्त कार्यक्रममा बरिष्ठ गायक प्रेमराजा महतको प्रमुख आतिथ्यता रहेको थियो ।

बरिष्ठ गायक एबं चलचित्र निर्देशक नारायण रायमाझी, राष्ट्रिय लोक तथा दोहोरी गीत प्रतिष्ठान नेपालका पुर्व अध्यक्ष चन्द्र शर्मा, चर्चित गायक रामजी खाण, चर्चित गायक एबं सर्जक किरणबाबु पुन, राष्ट्रिय लोक सञ्चारकर्मीका उपाध्यक्ष चन्द्रमणी गौतम, चर्चित गायिका राधिका हमाल लगायत थुप्रै कलाकार र पत्रकारहरुको उपस्थिती रहेको थियो ।

कार्यक्रम सञ्चालन हरी पुन मगरले गरेका थिए भने मिडिया संयोजकको रुपमा पत्रकार प्रकाश बराईली “अभिब्यक्ति” रहेका थिए ।

कार्यक्रममा “टिका पुन सांगीतिक साँझ” लाई भब्य रुपमा सफल पार्न आर्थिक, नैतिक, भौतिक रुपमा सहयोग गर्ने ब्यक्तिहरु र बिभिन्न मिडियाका पत्रकारहरुलाई प्रमुख अतिथीको रुपमा रहेका बरिष्ठ गायक प्रेमराजा महत, बरिष्ठ गायक एबं चलचित्र निर्देशक नारायण रायमाझी, दर्पण संगीतालयका अध्यक्ष उदिराम खड्का र टिका पुनको हातबाट सम्मान गएिको थियो ।

“टिका पुन सांगीतिक साँझ” लाई भब्य रुपमा सफल पार्न सहयोग गर्ने, प्रयोजक, सहयोगीदाता र पत्रकारहरु प्रती आभार प्रकट गर्दै टिका पुनले यो सहयोग कहिल्यै नबिर्सिने प्रतिबद्धता ब्यक्त गरेकी छिन् । कार्यक्रमको मिती घोषणा भए देखी कार्यक्रमको अन्तिम दिन सम्म न भोक न निन्द्रा गरेर खटिए भन्दै भाबुक हुँदै पनी बोलिन् । कतिपय ब्यक्तिले मलाई बाचा गरेर पनि धोका दिनुभयो । कतिपय ब्यक्तीले मलाई चित्त पनि दुखाउनु भयो ।

मलाई सुर्खेत भेरी तिरका ब्यक्तिहरुले सहयोग गर्नु भएन । सुर्खेतले आफ्नो चेलीलाई हेला गर्यो । तर पनि दर्शकहरुको मायाले हल भरिएर खचाखच भयो । कतिपय ब्यक्ति त हलमा नअटाएर फर्किन परो भन्दै गुनासो समेत ब्यक्त गरिन् ।

मनमा धेरै गुनासोहरु थिए तर यहाँ भनेर सम्भब छैन । जे जस्तो गुनासो भएपनि कार्यक्रम भब्य रुपमा सफल भयो । यसैमा खुसी छु भन्दै सबैलाई धन्यबाद दिदै आगामी दिनमा पनि यस्तै साथ सपोर्टको अपेक्षा राखेको कुरा टिका पुनले बताईन् ।