डडेल्धुरा,पुष २४ गते । अजमेरु गाउँपालिकाको वडा नं १ मा रहेको कोला समैजी मन्दिरमा १२५ किलोको दमाह चढाइएको छ । उक्त दमाहलाई काठमाडौंमा बनाइ पुष १९ गते पुइलेख पुर्‍याइएको थियो । उक्त दमाहलाई दोस्रो दिन बिहानै बैडा,मुद्राड,सिलिङे,महरगाउँ,कोटेली लगायतका गाउँका बासिन्दाले दमाहको पूजागरी बाजागाजा,झाँकी निकालेर पुइलेख बेंशीबाट करिब १ किलोमिटर उकालो दुरिमा रहेको मन्दिरमा पुर्‍याइएको थियो ।

गोरेटे भिरालो उकालो बाटो भएकाले सयौंको संख्यामा आएका स्थानीयहरुले पनि दमाहलाई मन्दिर सम्म पुर्‍याउन हम्मे हम्मे परेको थियो । बाटोमा बिसाउँदै “जय हो समैजी देवताकी ” भन्दै पहिलो भंडारमा पुर्‍याएका थिए । भंडारका पूजारीले दमाह र झाँकी सहितका स्थानीयवासीलाई स्वागत गरेका थिए ।

केहीबेरको बिश्रामपछी दमाह पुन:बोकी उक्त स्थान देखी ५ सय मिटर उकालो लागे । मन्दिर प्रांगणमा पुगेपछी मन्दिरमा रहेका पूजारीले धुप,अक्षेता र फुलमालाले स्वागत गरे । त्यसपछी झाँकीमा आएका बाजा दमाह बजाउँदै मन्दिरपरिसरमा रौकन छाएको थियो ।
मन्दिर बाहिर रहेको एक कोठामा उक्त दमाहलाई राखिएको छ ।

उक्त दमाहलाई जाँत पर्वका बेला बाहिर निकालिने र बजाउने कुरा मन्दिर ब्यवस्थापक (लौडिय) हरेन्द्र बहादुर भण्डारीले बताए ।

दमाह ५ फिट ५ इन्चको उचाई र ४ फिट ६ इन्च चौडाइ रहेको छ । तस्बिर:रतन चन्द ।